काठमाडौं, २६ असोज । भदौमा जेन–जी आन्दोलनको क्रममा ज्यान गुमाएका गोरखावासी शहीदहरूको परिवारलाई जिल्ला प्रशासन कार्यालय गोरखाले राहत रकम वितरण कार्य सुरु गरेको छ ।
प्रमुख जिल्ला अधिकारी (प्रजिअ) रामुराज कडरियाका अनुसार केही दिनअघिदेखि राहत वितरण प्रक्रिया अघि बढाइएको हो ।
आज पालुङटार नगरपालिका–३ निवासी स्व. अनिष पराजुलीको परिवारलाई औपचारिक रूपमा राहत रकम प्रदान गरिएको उनले बताए ।
पराजुलीकी पत्नी मञ्जु पौडेललाई वडाध्यक्ष रविन्द्र अधिकारी, सुरक्षा निकायका प्रतिनिधि तथा अन्य स्थानीय अधिकारीहरूको उपस्थितिमा राहत रकम हस्तान्तरण गरिएको थियो ।
प्रजिअ कडरियाका अनुसार प्रत्येक शहीद परिवारलाई १५ लाख रुपैयाँ राहतस्वरूप उपलब्ध गराइँदैछ । सो रकममध्ये १० लाख आर्थिक सहयोग र ५ लाख काजक्रिया तथा यातायात खर्चका लागि छुट्याइएको छ ।
“रकम सिधै पीडित परिवारको बैंक खातामा जम्मा गरिएको छ,“ उनले भने । २३ र २४ भदौमा भएको जेन–जी आन्दोलनका क्रममा गोरखाका चार जनाले ज्यान गुमाएका थिए।
मृतकमा अनिष पराजुलीसँगै बारपाक सुलिकोट–५ का बिमलबाबु भट्ट, गण्डकी गाउँपालिका–४ का अर्जुन भट्ट, र सिरानचोक–२ का सरोज गुरुङ रहेका छन् । तीमध्ये पराजुलीसहित तीन जनाका परिवारले राहत प्राप्त गरिसकेका छन्। सिरानचोकका सरोज गुरुङको परिवारले चाँडै राहत बुझ्ने जनाएको प्रजिअ कडरियाले बताए ।
सरकारले आन्दोलनका क्रममा ज्यान गुमाउनेहरूलाई शहीद घोषणा गर्दै परिवारलाई राहत दिने निर्णय यसअघि नै गरिसकेको थियो। सो निर्णयअनुसार गोरखामा शहीद परिवारलाई राहत वितरण प्रक्रिया अघि बढाइएको हो।
