काठमाडौं, २६ असोज । प्रधानमन्त्री सुशीला कार्कीले हालको जटिल परिस्थितिमा सबै राजनीतिक शक्ति र सरोकारवालाहरू एकजुट भएर मुलुकलाई अघि बढाउनु आवश्यक रहेको बताएकी छन् ।
राष्ट्रिय सभाका अध्यक्ष नारायणप्रसाद दाहालसँग सिंहदरबारस्थित प्रधानमन्त्री कार्यालयमा भएको भेटवार्तामा प्रधानमन्त्री कार्कीले राष्ट्रिय सहमति र साझा प्रयासबिना वर्तमान संकट पार लगाउन कठिन हुने उल्लेख गरिन् । उक्त भेटमा आसन्न राष्ट्रिय सभा निर्वाचन, सभाको बैठकको सम्भावित मिति, र संसद्का प्रक्रियागत विषयहरूबारे विस्तृत छलफल भएको थियो ।
अध्यक्ष दाहालले आगामी २० फागुनमा राष्ट्रिय सभाका एकतिहाइ सदस्यको कार्यकाल समाप्त हुँदै गएकाले त्यसको पूर्वतयारी स्वरूप निर्वाचनसम्बन्धी विषयमा प्रधानमन्त्रीसँग राय–विमर्श गरेका थिए । मौजुदा कानुनअनुसार सदस्यको कार्यकाल समाप्त हुनु ३५ दिनअगावै निर्वाचन सम्पन्न गर्नुपर्ने प्रावधान रहेको छ ।
सोही सन्दर्भमा निर्वाचनको समय, प्रक्रिया, र तयारीबारे प्रधानमन्त्री र अध्यक्षबीच समन्वयात्मक छलफल भएको हो । भेटपछि सञ्चारकर्मीहरूसँग कुरा गर्दै अध्यक्ष दाहालले प्रधानमन्त्रीसँग चुनाव तयारीका साथै राष्ट्रिय सभाको आगामी बैठक आह्वान गर्ने विषयमा पनि परामर्श गरिएको जानकारी दिए ।
बैठकमा रोकिएका विभिन्न विधेयकहरूको प्रक्रिया अगाडि बढाउनेबारे पनि महत्वपूर्ण संवाद भएको उनले उल्लेख गरे । यता, जेन–जी आन्दोलनको दोस्रो दिन भएको हिंसात्मक प्रदर्शनले बानेश्वरस्थित संघीय संसद् भवनमा आगजनी भई ठूलो क्षति पु¥याएको छ । संसद्को बैठक स्थगित भएको अवस्थामा वैकल्पिक स्थान तय गर्ने विषयमा सरकार र संसद् सचिवालय अन्योलमै रहेको छ।
