जनकपुर, २४ असोज । सप्तरीको रुपनी गाउँपालिका–१ मा गएराति भएको आगलागीले ठूलो क्षति पु¥याएका छन् ।
विद्युत सर्ट भएर सुरु भएको आगोले छ वटा घर पूर्ण रूपमा खरानी बनाएको हो । बिहीबार राति करिब १० बजेतिर ललित यादवको घरमा जडान गरिएको विद्युत मिटरको तारमा सर्ट हुँदा आगो लागेको प्रारम्भिक अनुसन्धानमा खुलेको छ ।
आगोले तीव्र रूपमा फैलिँदै यादवका छोराछोरीहरूको घरमा समेत पस्यो र सबै घरहरू पूर्ण रूपमा जलेर नष्ट भएको छ । यस घटनामा एक व्यक्ति घाइते भएका छन् भने आगलागीबाट करिब ५० लाख ३० हजार रुपैयाँ बराबरको सम्पत्ति, घरेलु सामान र चौपाया नष्ट भएको जिल्ला प्रहरी कार्यालयले बताए ।
स्थानीय बासिन्दा, प्रहरी र दमकलको सहयोगमा आगो नियन्त्रणमा लिइए पनि घरधनीहरूको सम्पूर्ण सम्पत्ति जलेर नष्ट भइसकेको थियो । पीडित परिवारहरू अहिले अस्थायी बासमा बसेका छन् ।
