काठमाडौं, २४ असोज । टोखा नगरपालिका–२ चण्डेश्वरीमा बिहीबार राति एक पुरुषको ज्यान जाने गरी कुटपिट भएको छ ।
घटनामा संलग्न रहेको आरोपमा प्रहरीले दुई जनालाई नियन्त्रणमा लिएको छ । पाँचथर जिल्लाका ४० वर्षीय राम लिम्बुको रड प्रहारबाट गम्भीर चोट लागेपछि उपचारका लागि ट्रमा सेन्टर लगिएको थियो । उपचारको क्रममा उनको मृत्यु भएको प्रहरी बताएको छ ।
घटनासँग सम्बन्धित रहेको आरोपमा उदयपुर घर भई टोखा बस्ने २७ वर्षीय गणेश लामा र सिन्धुलीका ४० वर्षीय खुप बहादुर तामाङलाई प्रहरीले सोही रात पक्राउ गरेको हो ।
प्राथमिक अनुसन्धान अनुसार केही समयको विवादपछि ती दुई व्यक्तिले लिम्बुलाई फलामको रडले आक्रमण गरेका थिए । घटनापछि बुढानीलकण्ठस्थित प्रहरी टोली घटनास्थल पुगेको र अनुसन्धान जारी रहेको जानकारी दियो ।
