जनकपुर, १७ असोज । जनकपुर उपमहानगरपालिकाले नगर क्षेत्रका अतिक्रमित फुटपाथ खाली गराउने अभियान सुरु गरेको छ ।
नगर प्रहरी टोलीले शुक्रवारदेखि माइकिङमार्फत व्यापारीहरूलाई फुटपाथ खाली गर्न आग्रह गर्दै आएको छ । रेल्वे स्टेशनदेखि बिभिन्नचोकमा यो अभियान चलाएको छ ।
अधिकांश फुटपाथमा सटर भएका व्यापारीहरूले नै सामान राखेर अतिक्रमण गरिरहेको पाइएपछि नगर प्रहरी प्रमुख नितेश रायको नेतृत्वमा अभियान तीव्र बनाइएको हो ।
नगर प्रमुख मनोज साहले फुटपाथ खाली नगर्ने व्यापारीहरूमाथि शनिवारदेखि सामान जफत गर्ने कार्य सुरु गरिने चेतावनी दिएका छन् ।
रामचोक, जनकचोक, शिवचोक लगायत क्षेत्रका सडक पेटीमा चिया पसल र ठेला समेत राखिएको अवस्था देखिएको छ । योजना अनुसार यो अभियान निरन्तर चलाइने र अटेरी गर्ने व्यापारीहरू विरुद्ध कानुनी कारबाही हुने जनाइएको छ ।
सडकमा ट्राफिक जाम, दुर्घटनाको जोखिम, र नगरको सौन्दर्य बिग्रिएको जनगुनासोपछि यो कडाइ गरिएको हो ।
