जनकपुर, १६ असोज । जनकपुरको देवी चौक नजिक बुधबार राति करिब ८ बजे अमित साहमाथि सामूहिक आक्रमण भएको छ ।
स्थानीय निवासी साहमाथि १२–१५ जनाको समूहले योजना अनुसार कुटपिट गरेको उनको दाबी छ ।
साहले सामाजिक सञ्जाल फेसबुकमा लेखेका अनुसार, उनीमाथि प्रशान्त कर्ण (उर्फ अरविन्द) र जनकपुर उपमहानगरपालिका–१० का नेपाली कांग्रेस नगर सभापति गणेश ठाकुरको नेतृत्वमा आएको समूहले मादकपदार्थ सेवन गरी आक्रमण गरेका हुन् ।
उनीहरूलाई अरु केही युवाहरूले साथ दिएको उल्लेख गरेको छ । साहका अनुसार, आक्रमणकारीहरूले उनको मोटरसाइकल जबर्जस्ती रोकेर साँचो खोसे, मोबाइल फोन तोडे र शरीरका विभिन्न भागमा कुटपिट गरे ।
यस घटनामा उनी घाइते भएका छन् र अहिले प्रदेशिक अस्पताल जनकपुरमा उपचाररत छन् । घटनापछि पीडित साहले जिल्ला प्रहरी कार्यालय धनुषा र जानकी चौकीमा निवेदन दिएका छन् ।
उनले दोषीहरूमाथि कडा कानुनी कारबाहीको माग गरेका छन् ।
