काठमाडौं, १२ असोज । जेन जी आन्दोलन (२३ र २४ भदौ) का क्रममा नेताहरूका घरसहित विभिन्न स्थानमा नगद भेटिएको वा जलेको खबर सार्वजनिक भएपछि अर्थ मन्त्रालयले त्यसबारे अनुसन्धान तीव्र पारिएको बताए ।
मन्त्रालयले यस्ता घटनाप्रति गम्भीर ध्यानाकर्षण भएको उल्लेख गर्दै नागरिकलाई सम्भव भएसम्म कारोबार विद्युतीय भुक्तानीमार्फत गर्न आग्रह गरेको छ । अर्थ मन्त्रालयका अनुसार कानूनी रूपमा आर्जित प्रष्ट भएको रकम जतिसुकै भए पनि आफ्नो साथमा राख्न पाइन्छ ।
तर, सम्पत्ति शुद्धीकरण निवारण ऐन, २०६४ अनुसार १० लाख रुपैयाँभन्दा बढीको कारोबार गर्दा अनिवार्य रूपमा बैंकिङ प्रणाली प्रयोग गर्नुपर्ने प्रावधान छ । त्यसैगरी नेपाल भित्रिँदा नेपाली नागरिकले ५ हजार रुपैयाँसम्म भन्सार घोषणा नगरी ल्याउन सक्ने र सो भन्दा बढी रकम भन्सारमा घोषणा गरेर प्रमाणित गर्नुपर्ने व्यवस्था छ ।
विदेशमा रोजगारी, व्यवसाय सुविधा अन्तर्गत प्राप्त वैध विदेशी मुद्रा मध्ये बचत भएको रकम पनि राख्न पाइने उल्लेख गर्दै मन्त्रालयले एक नेपाली नागरिकले अधिकतम अमेरिकी डलर १५ सय (वा सो बराबरको अन्य परिवत्र्य विदेशी मुद्रा) नगद राख्न पाउने प्रावधान रहेको जनाए । अर्थ मन्त्रालयले कानूनी प्रावधानअनुसार स्रोत नखुलेको नगद वा सम्पत्तिबारे सम्बन्धित निकाय सक्रिय भई अनुसन्धान गरिरहेको स्पष्ट पारेको छ ।
