काठमाडौं, १२ असोज । जेनजी आन्दोलनका क्रममा घाइते भएका व्यक्तिहरूलाई अब उपचारमा सहजता हुने भएको छ ।
गृहमन्त्री ओमप्रकाश अर्यालले आज विभिन्न अस्पताल पुगेर घाइतेहरूसँग भेटघाट गर्दै उनीहरूलाई विशेष परिचयपत्र वितरण प्रक्रिया सुरु गरेका छन् । गृह मन्त्रालयको निर्णयअनुसार, आन्दोलनमा घाइते भएका बिरामीहरूको निरन्तर उपचार सुनिश्चित गर्न ‘जेनजी क्लिनिक’ स्थापना गरिएको हो ।
काठमाडौं उपत्यकासहित देशभरका १६ वटा अस्पतालमा यी क्लिनिक सञ्चालनमा ल्याइएको मन्त्रालयले बताए । यस क्लिनिकमार्फत घाइतेहरूको फलोअप उपचार व्यवस्थित हुने र अस्पतालसम्मको यातायात सेवा निःशुल्क उपलब्ध हुने व्यवस्था मिलाइएको छ ।
साथै उपचारमा सहजता ल्याउन प्रत्येक अस्पतालमा जिम्मेवारीसमेत तोकिएको छ । मन्त्रालयका अनुसार, जेनजी आन्दोलनमा घाइते भएका नागरिकलाई अब स्वास्थ्य उपचारमा कुनै अवरोध नहोस् भन्ने उद्देश्यले विशेष संरचना तयार गरिएको हो ।
