काठमाडौं, १२ असोज । एसिया कप क्रिकेटमा आज यूएईको मैदानमा ऐतिहासिक क्षणतर्फ उन्मुख भएको छ ।
प्रतियोगिताको ४१ वर्ष लामो यात्रामा पहिलोपटक भारत र पाकिस्तान उपाधि भिडन्तमा आमनेसामने हुँदैछन् ।
दुबई अन्तर्राष्ट्रिय क्रिकेट रंगशालामा बेलुकी सवा ८ बजे सुरु हुने यो खेललाई क्रिकेट प्रेमीहरूले ‘विश्वकै सबैभन्दा प्रतिक्षित टक्कर’ का रूपमा हेरेका छन् ।
भारत अपराजित, पाकिस्तान चुनौतीसहित
भारत यस संस्करणमा अहिलेसम्म कुनै खेल नहार्दै फाइनल पुगेको हो । समूह चरण र सुपर फोर दुवैमा भारतले पाकिस्तानलाई सहजै पराजित गरिसकेको छ । यसपटक पनि उपाधि बचाउने आत्मविश्वास भारतीय शिविरमा प्रबल छ ।
ओपनर अभिषेक शर्माले ३०९ रनसहित ब्याटिङतर्फ शीर्ष स्थान ओगटेका छन् भने कुलदीप यादव १३ विकेटसहित बलिङ चार्टमा अगाडि छन् । जसप्रीत बुम्राहले पावरप्लेमा लगातार दबाब सिर्जना गरिरहेका छन् ।
पाकिस्तानले भने समूह चरणमै उतारचढाव झेले पनि बंगलादेशविरुद्धको निर्णायक जितपछि उपाधि भिडन्तमा स्थान सुरक्षित गरेको हो । कप्तान सलमान आघाले भारतविरुद्ध फाइनल जित्ने आत्मविश्वास व्यक्त गर्दै टोली तयार रहेको बताएका छन् ।
खेलमै सीमित नभएको भिडन्त
भारत–पाकिस्तानबीच यसअघि सैनिक तनावले खेलमै असर पारेको छ । मैदानमा हात नमिलाउने, तिक्त बोली र आक्रामक हाउभाउ जस्ता घटनाले विवाद बढाएका थिए । यही कारण आइतबारको फाइनललाई खेल मात्र नभई राजनीतिक र भावनात्मक दबाबको प्रत्यक्ष रूपका रूपमा पनि हेरिएको छ ।
भारतीय कप्तान सूर्यकुमार यादवले भने टोलीले डरभन्दा रणनीतिमा ध्यान दिने जनाएको छ ।
सम्भावित टोली
भारत (सम्भावित ११)ः अभिषेक शर्मा, शुभमन गिल, सूर्यकुमार यादव (कप्तान), तिलक वर्मा, सन्जु सामसन (विकेटकिपर), हार्दिक पाण्ड्या, शिवम दुबे, अक्षर पटेल, कुलदीप यादव, वरुण चक्रवर्ती, जसप्रित बुम्राह ।
पाकिस्तान (सम्भावित ११)ः शाहिबजादा फरहान, फखर जमन, सायम अयुब, हुसैन तलत, मोहम्मद नवाज, सलमान आघा (कप्तान), फहीम अशरफ, मोहम्मद हारिस (विकेटकिपर), शाहिन शाह अफ्रिदी, हारिस राउफ, अबरार अहमद ।
पिच र परिस्थिति
दुबई रंगशालाको सेन्ट्रल पिचमा फाइनल खेल हुनेछ, जहाँ पछिल्ला पाँच वर्षमा औसत पहिलो इनिङ स्कोर १५६ रन छ । स्पीन बलरहरूको भूमिका पुनः महत्त्वपूर्ण हुने अनुमान गरिएको छ । ३६ डिग्री तापक्रम र सम्भावित डियूका कारण टसले खेलको दिशा निर्धारण गर्न सक्छ ।
एशियन क्रिकेट काउन्सिलले स्टेडियम भरिने अपेक्षा गरेको छ । यसै कारण यो खेल उपाधि जित्ने प्रतिस्पर्धा मात्र नभई क्रिकेट इतिहासकै पहिलो भारत–पाकिस्तान फाइनलका रूपमा पुस्तौसम्म सम्झिने घटना बन्ने निश्चित छ।
