काठमाडौं, १० असोज । राष्ट्रिय स्वतन्त्र पार्टी (रास्वपा) को केन्द्रीय कार्यालय रहेको भवन तीन महिनाभित्र खाली गरिदिन घरधनीले आग्रह गरेको छ ।
रास्वपाले हाल बनस्थलीमा कार्यालय सञ्चालन गर्दै आएको भवनका घरधनी भरतमणि देवकोटाले लामो समयदेखि भाडा नपाएको र व्यक्तिगत सुरक्षाका कारण घर खाली गर्नुपर्ने सूचना दिएका हुन् ।
अमेरिकामा रहेका देवकोटाले भने, “१० महिनादेखि भाडा पाएको छैन । पार्टीलाई सापट दिएको रकम पनि अझै फिर्ता आएको छैन । ठूलो परिमाणमा सापट दिएको छु, तर कति भन्ने अहिले खुलाउन चाहन्न।” उनका अनुसार मासिक तीन लाख पचास हजार रुपैयाँमा भाडा सम्झौता भएको थियो ।
रास्वपाको अनुशासन आयोगका प्रमुख रहँदै अमेरिका गएका देवकोटाको जिम्मेवारी अहिले अर्का व्यक्तिलाई तोकिएको छ । उनले पार्टीभित्रको संलग्नता र घरभाडाको विषय फरक–फरक भए पनि नेतृत्वले त्यसलाई बुझेर व्यवहार नगरेको गुनासो गरेका छन् ।
स्थापना कालमा बसुन्धरामा रहेको रास्वपाको कार्यालय सानो ठहरिएपछि देवकोटाको घरमा सारिएको हो । रास्वपा सभापति रवि लामिछाने दोस्रोपटक गृहमन्त्री हुँदा देवकोटा पार्टीका विज्ञ सल्लाहकार समेत बनेका थिए ।
