काठमाडौं, ३० भदौ । सोमबार राष्ट्रपति कार्यालयको खण्डहर भवन बाहिर पाल टाँगेर विशेष कार्यक्रम गरी तीन नयाँ मन्त्रीहरूले शपथ ग्रहण गरेका छन् ।
प्रधानमन्त्री सुशीला कार्कीको उपस्थितिमा राष्ट्रपति रामचन्द्र पौडेलले उनीहरूलाई शपथ गराएको हो । जेनजी आन्दोलनका क्रममा भएको आगजनीका कारण शीतल निवास प्रयोगयोग्य नभएपछि यो वैकल्पिक व्यवस्था गरिएको हो ।
गत शुक्रबार प्रधानमन्त्री कार्कीको शपथ राष्ट्रपति निवास भित्रै सम्पन्न भएको थियो भने आजको कार्यक्रममा मन्त्रीहरूको शपथ खुला आकाशमुनि गरियो । शपथ कार्यक्रममा सरकारी अधिकारीहरू, कूटनीतिक नियोगका प्रतिनिधिहरू र अन्य अतिथिहरू पनि सहभागी थिए ।
आज शपथ लिने तीन मन्त्रीहरूमा अर्थमन्त्री रामेश्वर खनाल, ऊर्जा, भौतिक योजना तथा सहरी विकास मन्त्री कुलमान घिसिङ र गृह तथा कानुन मन्त्री ओमप्रकाश अर्याल रहेका छन् । घिसिङलाई तीन मन्त्रालय र अर्याललाई दुई मन्त्रालयको अतिरिक्त जिम्मेवारी दिइएको छ ।
