काठमाडौं, ११ भदौ । प्रधानमन्त्री केपी शर्मा ओली आगामी शनिबार चीन प्रस्थान गर्ने भएका छन् ।
परराष्ट्र मन्त्रालयले जारी गरेको विज्ञप्तिअनुसार उनले चिनियाँ राष्ट्रपति सी चिनफिङको निमन्त्रणामा पाँच दिने औपचारिक भ्रमण गर्नेछन् । भ्रमणको क्रममा ओलीले उत्तरी चीनको तियान्जिनमा आयोजना हुने १५–१६ भदौको शङ्घाई सहयोग संगठन (एससीओ) शिखर सम्मेलनमा सहभागी हुनेछन् । सम्मेलनको उद्घाटन राष्ट्रपति सीले गर्नेछन् भने भारतीय प्रधानमन्त्री नरेन्द्र मोदीसहित विभिन्न राष्ट्र तथा सरकार प्रमुखहरूको उपस्थिति रहनेछ ।
प्रधानमन्त्री ओलीले सम्मेलनलाई सम्बोधन गर्ने कार्यक्रम छ । साथै, उनले राष्ट्रपति सी चिनफिङसँग विशेष भेटवार्ता गर्ने, उपराष्ट्रपति हान झेङसहित अन्य नेताहरूसँग द्विपक्षीय छलफल गर्ने तय भएको मन्त्रालयले जनाएको छ ।
भ्रमणका क्रममा उनले जापानी आक्रमणविरुद्ध चीनको प्रतिरोध युद्ध तथा विश्वव्यापी फासिवादविरोधी युद्धमा विजय प्राप्तिको ८०औं वार्षिकोत्सव कार्यक्रममा पनि सहभागिता जनाउनेछन् ।
प्रधानमन्त्रीको भ्रमण टोलीमा शिक्षामन्त्री रघुजी पन्त, संस्कृति–पर्यटनमन्त्री बद्रीप्रसाद पाण्डे, नेपाली कांग्रेस उपसभापति पूर्णबहादुर खड्का, प्रधानमन्त्रीका आर्थिक सल्लाहकार डा. युवराज खतिवडा, सांसद् छविलाल विश्वकर्मालगायतका उच्च पदस्थ अधिकारीहरू रहने छन् ।
चीन भ्रमण सकेर फर्किएलगत्तै प्रधानमन्त्री ओली भारतको भ्रमणमा जाने तयारी रहेको परराष्ट्र मन्त्रालयले जनाएको छ ।
