काठमाडौं, २ भदौ । अमेरिकी राष्ट्रपति डोनाल्ड ट्रम्पले युद्ध अन्त्य गर्नका लागि युक्रेनले रूसको शर्त मान्नुपर्ने बताएका छन् ।
युक्रेनी राष्ट्रपति भ्लोदिमिरि जेलेन्स्कीसँग भेटको पूर्वसन्ध्यामा ट्रम्पले युद्ध अन्त्य गरेर शान्ति सम्झौता गर्न युक्रेन नेटोमा सामेल हुन नपाउने शर्त अघि सारेको हो ।
ह्वाइट हाउसमा युक्रेनी राष्ट्रपति जेलेन्स्कीसँग भेट्नु केही घण्टा अघि ट्रम्पले क्रिमिया प्रायद्वीप पनि युक्रेनले फिर्ता नपाउने बताए । मस्कोले २०१४ मा क्रिमिया कब्जा गरेको थियो । पछिल्लो पटक सन् २०२२ देखि रूसले युक्रेनमाथि आक्रमण सुरु गरेका थिए ।
अलास्कामा रूसी राष्ट्रपति भ्लादिमिर पुटिनसँग भएको शिखर बैठकपछि जेलेन्स्कीलाई अमेरिका बोलाएका ट्रम्पले युक्रेनलाई नेटोमा सामेल नहुने शर्त र क्रिमिया छाड्न सुझाएको छ । युक्रेनले अहिलेसम्म यी दुवै शर्त मान्न नसकिने बताउँदै आएका छन् ।
नेटोमा सामेल हुने कुरा आफ्नो सार्वभौमिक अधिकारको निर्णय बताउँदै आएको युक्रेनलाई ट्रम्पले अघि सारेका शर्त मञ्जुर हुने÷नहुनेमा आशंका छ । अलास्कामा भएको पुटिनसँगको शिखर वार्तामा ट्रम्पले युद्धविरामको मागलाई छोडेर स्थायी शान्ति सम्झौताका लागि आह्वान गरेका थिए ।
आइतबार अबेर अमेरिका आइपुगेका जेलेन्स्कीले सहयोगी राष्ट्रहरूबाट प्रभावकारी सुरक्षा ग्यारेन्टीको माग दोहो¥याएका छन् । एक अमेरिकी दूतका अनुसार युक्रेनको सुरक्षार्थ नेटो जस्तै तर, फरक अमेरिकी सुरक्षा सम्झौताका लागि पुटिन समेत तयार भएका छन् ।
छिमेकी मुलुक युक्रेन नेटोमा सामेल भए आफ्नो देशको सीमासम्मै युरोपेली गठबन्धन सेना नेटोका सैनिक आइपुग्ने आशंका पुटिनलाई छ । साथै ट्रम्पले युक्रेनले क्रिमिया गुमाउनुमा अमेरिकी पूर्वराष्ट्रपति बाराक ओबामाको हातमा रहेको भन्दै आरोपित गरेको छ ।
यस्तै फ्रान्सेली राष्ट्रपति इमानुएल म्याक्रोन, इटालियन प्रधानमन्त्री जियोर्जिया मेलोनी, जर्मन चान्सलर फ्रेडरिक मजर, फिनिश राष्ट्रपति अलेक्जेन्डर स्टब र युरोपेली आयोगका अध्यक्ष उर्सुला भोन डेर लेयन यसअघि नै संयुक्त वक्तव्य जारी गरेर युक्रेनलाई समर्थन गर्ने जनाए ।
