जनकपुर, १९ साउन । आईतवार मधेश प्रदेशका सांसद लखन दासको विशेष पहलमा नेकपा (एस) पार्टी परित्याग गर्दै कमला नगरपालिका वडा नं. ५ का निर्वाचित वडा अध्यक्ष शिवा पासवान र युवा नेता अजय गौइत नेकपा (एमाले)मा प्रवेश गरेका छन् ।
जनकपुरमा आयोजित एक कार्यक्रममा नेकपा एमालेका केन्द्रीय सचिव तथा पूर्व उपप्रधानमन्त्री रघुवीर महासेठले उनीहरूलाई पार्टीको पहिचान स्वरूप टीका लगाइदिएर स्वागत गरे ।
महासेठले मधेशमा एमालेको बढ्दो लोकप्रियता र संगठन विस्तारप्रति खुशी व्यक्त गर्दै पार्टीमा आएका नयाँ सदस्यहरूले संगठनलाई थप बलियो बनाउने विश्वास व्यक्त गरे ।
सांसद लखन दासले पनि एमालेमा प्रवेश गर्ने क्रम मधेशमा तीव्र भइरहेको जनाउँदै पासवान र गौइतजस्ता स्थानीय नेताको आगमनले स्थानीय तहमा एमालेको उपस्थिति सशक्त हुने बताए ।
नेकपा (एस) पार्टी परित्याग गरेका पासवान हाल कमला नगरपालिका वडा नं. ५ का निर्वाचित अध्यक्ष हुन् भने गौइत मधेश प्रदेशमा युवाहरुबीच परिचित सामाजिक तथा राजनीतिक अनुहार मानिन्छन् ।
