शिक्षा, रोजगारी र समानताको आवाज : बेचन दासको योजनागत सम्वाद

अन्तरवार्ता : कुलदिप दास
प्रश्न १: नगरप्रमुखज्यू, तपाईं दलित समुदायबाट निर्वाचित नगर प्रमुख हुनुहुन्छ । यो जिम्मेवारी पाउँदा कस्तो अनुभूति भइरहेको छ?
नगरप्रमुख बेचन दास
सबैभन्दा पहिला म विदेह नगरबासीप्रति आभार प्रकट गर्न चाहन्छु । दलित समुदायबाट म निर्वाचित हुनु यो हाम्रो लोकतन्त्रको एक ऐतिहासिक कदम हो । म केवल दलित समुदायको प्रतिनिधि होइन, म सम्पूर्ण नगरवासीको सेवक हुँ । अब मलाई प्रमाणित गर्नुछ – दलित समुदाय पनि नेतृत्व गर्न सक्छ, र देश निर्माणमा सक्षम भूमिका खेल्न सक्छ ।
प्रश्न २: शिक्षा क्षेत्रको अवस्था कस्तो देख्नुहुन्छ? सुधारका लागि के योजना छ?
नगरप्रमुख बेचन दास
विदेहमा अझै धेरै बालबालिकाले गुणस्तरीय शिक्षा पाउन सकेका छैनन् । विशेष गरी दलित तथा विपन्न वर्गका बालबालिकाको उपस्थिति कम छ । यसलाई ध्यानमा राख्दै हामीले सामुदायिक विद्यालयमा डिजिटल कक्षा र नियमित शिक्षक अनुगमन गर्ने व्यवस्था सुरु गरेका छौं । ‘एक घर, एक विद्यार्थी उच्च शिक्षा’ अभियानमार्फत छात्रवृत्ति कार्यक्रम पनि बढाउँदैछौं ।
प्रश्न ३ : स्वास्थ्य सेवाको पहुँच र गुणस्तर सुधारका लागि के पहल भइरहेको छ?
नगरप्रमुख बेचन दास
हामीले प्रत्येक वडामा आधारभूत स्वास्थ्य सेवा पहुँच पु¥याउने लक्ष्य राखेका छौं। प्राथमिक स्वास्थ्य केन्द्रलाई २४ सै घण्टा सञ्चालन गर्ने, महिला स्वास्थ्य स्वयंसेविकाको भूमिका विस्तार गर्ने र सुरक्षित मातृत्व सेवामा जोड दिने योजना छ । साथै, दलित र पिछडिएको वर्गलाई लक्षित स्वास्थ्य बीमा अभियान सञ्चालन गर्दैछौं ।
प्रश्न ४: कृषि विदेहको प्रमुख आर्थिक आधार हो । किसानलाई सहयोग गर्न के गरिंदैछ?
नगरप्रमुख बेचन दास
कृषि नै हाम्रो मेरुदण्ड हो । तर, कृषक अझै परम्परागत प्रणालीमा अड्किएका छन् । त्यसैले, हामीले किसान परिचयपत्र वितरण, सिंचाइ सुविधा विस्तार, अनुदानमा बीउ र मल वितरण जस्ता कार्यक्रम सुरु गरेका छौं । स्थानीय स्तरमै ‘कृषक सहकारी केन्द्र’ स्थापना गरी उत्पादनको बजार सुनिश्चित गर्न खोज्दैछौं ।
प्रश्न ५: युवाहरूको विदेश पलायन बढ्दो छ । स्थानीय रोजगारीका सम्भावनाबारे तपाईंको दृष्टिकोण के हो?
नगरप्रमुख बेचन दास
यो हाम्रो सबैभन्दा चिन्ताजनक पक्ष हो । हामीले युवाहरूलाई लक्षित गर्दै सीपमूलक तालिम, उद्यमशीलता अनुदान कार्यक्रम र सहकारी माध्यमबाट व्यवसायिक कृषि सञ्चालन गर्न प्रोत्साहन गरिरहेका छौं । नगरपालिकाले रोजगारी सृजनालाई प्राथमिकता दिएको छ – युवा उत्पादनमा जोड दिनुपर्छ, निर्यातमा होइन ।
प्रश्न ६: दलित समुदाय अझै पनि विभेदको चपेटामा छ । नगर प्रमुखको हैसियतमा के परिवर्तन ल्याउने सोच राख्नु भएको छ?
नगरप्रमुख बेचन दास
दलित हुनु आफ्नो दोष होइन, तर दुर्भाग्यपूर्ण इतिहासको हिस्सा हो । अब हामी त्यो इतिहासलाई बदल्नुपर्छ । मेरो पहिलो काम भनेको दलित समुदायभित्र आत्मविश्वास निर्माण गर्नु हो । सेवा, अवसर, सम्मान सबैमा समान पहुँच दिन म कटिबद्ध छु । हाम्रो पालिकाले ‘समावेशी नीति’ ल्याउने तयारीमा छ, जसले दलित, महिला, जनजाति सबैलाई बराबरी अवसर दिन्छ ।
प्रश्न ७: अन्तिममा, नगरवासीहरूप्रति के सन्देश दिन चाहनुहुन्छ?
विदेह हाम्रो साझा घर हो । यसको विकास हामी सबैको जिम्मेवारी हो । म एकजना जनप्रतिनिधि मात्र हुँ – सफलताका लागि तपाईंहरूको साथ र सुझाव अत्यन्त आवश्यक छ । म वाचा गर्छु – म सधैं सत्य, पारदर्शिता र समर्पणका साथ काम गर्नेछु ।