ताप्लेजुङ, ३१ बैशाख । ताप्लेजुङको मैवाखोला गाउँपालिका–५ मा रहेको पार्टीडाँडा माध्यमिक विद्यालयबाट हराएका ८ ल्यापटप बोरामा पोको पारेर पुरिएको अवस्थामा फेला परेका छन् ।
सोही वडाको पित्तोलुङ भन्ने स्थानमा ल्यापटपहरू फेला परेको मैवाखोला गाउँपालिकाका अध्यक्ष विजयप्रकाश वनेमले जानकारी गराए। उनका अनुसार २०८० पुस २२ गते राति विद्यालयको ढोका फोरेर ११ ल्यापटप चोरी भएको थियो ।
ह्युमन प्राक्टिस फाउन्डेसन (एचपिएफ) ले शैक्षिक गुणस्तर सुधार कार्यक्रमअन्तर्गत आइसीटी कक्षा स्थापनाका लागि विद्यालयलाई ती ल्यापटप हस्तान्तरण गरेको थिया । हस्तान्तरण भएको केही समयमै विद्यालय फोरेर ल्यापटप चोरी भएको अध्यक्ष वनेमले सुनाए। प्रहरी, वडाध्यक्ष, विद्यालयका प्रधानाध्यापक र स्थानीयले खोजतलास गर्दा ती ल्यापटप फेला परेका हुन्।
अध्यक्ष वनेमले घटनामा संलग्न व्यक्तिको खोजी गरी सार्वजनिक गर्न र कानुनअनुसार कारबाही अघि बढाउन जिल्ला प्रशासन कार्यालय र जिल्ला प्रहरी कार्यालयको ध्यानाकर्षण गराएका छन् ।
