काठमाडौँ, ३० वैशाख । ’ग्रेटर नेपाल राष्ट्रवादी मोर्चा’ र ’ग्रेटर नेपाल कम्युनिस्ट पार्टी’ले काठमाडौँस्थित भारतीय दूतावासअगाडि प्रदर्शन गरेका छन् ।
उनीहरूले नेपालमाथिको हस्तक्षेप बन्द गर्न माग गर्दै मंगलवार दूतावासअगाडि प्रदर्शन गरेका हुन् । नेपाली भूमि भारतमा पार्ने बदनियतले भारत सरकारले महाकाली नदीमा एकपक्षीय रूपमा तटबन्ध निर्माण गरिरहेको भन्दै विरोध जनाइएको छ ।
उनीहरूले नेपालमाथिको हस्तक्षेप बन्द गर, इण्डियन हस्तक्षेप मुर्दावाद, राष्ट्रपतिदेखि सबै कर्मचारीसम्मको सेवा सुविधा समान गर, गोर्खा भर्ती सम्झौता खारेज गर लगायतका प्लाकार्ड बोकेर प्रदर्शन गरेका हुन् ।
साथै उनीहरूले दूतावासमा ज्ञापनपत्र समेत बुझाएका छन् ।
