जनकपुर, २८ वैशाख । जनता समाजवादी पार्टीका अध्यक्ष उपेन्द्र यादवले अहिलेको सरकार विचौलियाको सरकार रहेको आरोप लगाएका छन ।
समाजवादी महिला संघको प्रथम राष्ट्रिय महाधिवेशनको उद्घाटन सत्रलाई सम्बोधन गर्दै अध्यक्ष यादवले वर्तमान सरकार जनताको नभई तस्कर र विचौलियाहरुको रहेको आफैले पुष्टि गरि सकेको उनले बताएका छन ।
अमेरिकी राष्ट्रपतिले आफनो संसदमै नेपाली नेताहरुलाई फ्रड लिडर भनेर सम्बोधन नै गरि सकेको स्मरण गराउदै अध्यक्ष यादवले अहिलेको सरकार मुलुकमा मात्र नभई वैश्विक स्तरमै आफनो विश्वास गुमाई सकेको उनले भने ।
मुलुक अहिले वैदेशिक रेमिट्यान्सले संचालन भई रहदा समेत सरकारले वैदेशिक रोजगारमा रहेका श्रमिकहरुका लागि ठोस नीति ल्याउन नसक्नु राज्यकै लागि लज्जास्पद रहेको बताए ।
परिवर्तन विरोधी शक्तिहरु मुलुकलाई प्रतिगमन तीर लैजाने षडयन्त्र गरि रहेको दावी गर्दै अध्यक्ष यादवले उनिहरु सडक , सदन र षडयन्त्र तीन वटै मोर्चामा भिडेको बताए ।
एतिहाँसिक जनआन्दोलन जनयुद्ध र मधेश विद्रोहको बलमा स्थापित संघीय लोकतान्त्रिक गणतन्त्रको रक्षाको निमित परिवर्तनकारी शक्तिहरुलाई सचेत हुनु पर्ने बेला आएको बताए ।
महिला संघका अध्यक्ष निर्मला यादवको अध्यक्षतामा भएको उद्घाटन सत्रमा उपाध्यक्ष विद्युत ब्रजाचार्य, महासचिव एवं मधेश प्रदेशका प्रथम मुख्यमन्त्री लालबाबु राउत, रेखा यादव, प्रमिला यादव, हरिनारायण यादव, डा. सुरेन्द्र यादव सहितका वक्ताहरुले शुभकामना मन्तव्य राखेका थिए ।
