जनकपुर, २० वैशाख । जानकी नवमीको अवसरलाई मध्यनजर गर्दै ए टु जेड कम्प्युटर एण्ड ट्रेनिङ सेन्टरले जनकपुरस्थित प्रसिद्ध जानकी मन्दिर परिसरमा विशेष सरसफाइ कार्यक्रम सम्पन्न गरेको छ ।
धार्मिक तथा पर्यटकीय दृष्टिले महत्वपूर्ण स्थानको रूपमा चिनिने जनकपुरलाई स्वच्छ, आकर्षक र स्वागतयोग्य बनाउने उद्देश्यले आज बिहान सरसफाइ अभियान सञ्चालन गरिएको थियो । 
सरसफाई कार्यक्रममा ए टु जेड कम्प्युटर एण्ड ट्रेनिङ सेन्टरका सञ्चालक संजय यादवसहित संस्थामा आबद्ध कर्मचारी, प्रशिक्षार्थी तथा विद्यार्थीहरुले सहभागिता जनाएका थिए । 
सञ्चालक यादवले भने, “जनकपुर एक ऐतिहासिक र धार्मिक सहर हो, यहाँ दैनिक हजारौं श्रद्धालु तथा पर्यटकहरू आउँछन् । जानकी नवमीजस्तो विशेष पर्वको सन्दर्भमा मन्दिर परिसर सफा र व्यवस्थित हुनु अत्यावश्यक हुन्छ ।
हामीले यो अभियानमार्फत सन्देश दिन चाहेका छौं कि धार्मिक स्थलहरूको सरसफाइमा सबैले ध्यान दिनुपर्छ ।“ यस अवसरमा सहभागीहरूले मन्दिर वरपरको फोहोर संकलन, फोहर बाल्टिनहरूको व्यवस्थापन, ढुसी हटाउने कार्यलगायत गतिविधि गरेका थिए । 
स्थानीयहरूद्वारा ए टु जेडको यो प्रयासको सराहना गरिएको छ । उनीहरूले यस्ता सामाजिक कार्यहरूलाई निरन्तरता दिनुपर्ने सुझावसमेत दिएका छन् ।
