कठमान्डौँ, ७ बैशाख । नेकपा (एमाले) सुदूरपश्चिम प्रदेश लेखा समितिका सदस्य बालागिरी कुँवरसहित ७० जना नेता तथा कार्यकर्ताले पार्टी परित्याग गर्दै सामूहिक राजीनामा दिएका छन् ।
एक विज्ञप्तिमार्फत् कुँवरले करिब ३५ वर्ष लामो राजनीतिक यात्रा अन्त्य गर्दै ‘ मातृभूमि जागरण अभियान ’ मा सहभागी हुने घोषणा गरेको हो ।
कुँवरले २०३६ सालदेखि बहुदलीय व्यवस्था स्थापनाको आन्दोलनमा होमिएको आफ्नो राजनीतिक यात्रा २०४६ को जनआन्दोलन, जनयुद्धको चुनौतीपूर्ण समय र डा. भीम रावलको नेतृत्वमा सञ्चालित शान्ति अभियान हुँदै निरन्तर सक्रिय रहँदै आएको स्मरण गरेका छन् ।
उनले २०५४ र २०७४ सालमा दुईपटक वडा अध्यक्षको जिम्मेवारी सम्हाल्दै जनमुखी विकास निर्माणमा योगदान दिएको उल्लेख गर्दै, समाजवाद र साम्यवादको सपना बोकेर जनताको घरदैलोमा पुगे पनि त्यो सपना साकार नहुँदा आफूजस्ता कार्यकर्ताहरूमा गहिरो निराशा पैदा भएको बताएका छन् ।
एमाले अध्यक्ष केपी शर्मा ओलीको गुटबन्दी प्रवृत्ति, निरङ्कुश कार्यशैली, पार्टीभित्र आन्तरिक लोकतन्त्रको अभाव, भ्रष्टाचारमा लिप्त नेताहरूलाई संरक्षण, र जनवादी मूल्यहरूको ह्रासले गर्दा आफूहरूले पार्टी परित्याग गर्ने निर्णयमा पुगेको कुँवरसहितका नेताहरूले जारी गरेको वक्तव्यमा उल्लेख गरिएको छ ।
