जनकपुर, २२ चैत । मधेश प्रदेशका मुख्यमन्त्री सतिशकुमार सिंहले शुक्रबार धनुषाकोे मिथिला नगरपालिका–४ मा पर्ने जलाद खोलाको अनुगमन गर्नुभएको छ ।
अनुगमनको क्रममा खोलाबाट अवैध रूपमा नदीजन्य पदार्थकोे उत्खनन भइरहेको भेटिएपछि उत्खनन तथा ओसारपसारमा प्रयोग भइरहेको सात वटा टिपर र दुई वटा जेसिबी मेसिन नियन्त्रणमा लिएर इलाका प्रहरी कार्यालय ढल्केबरको जिम्मा लगाउनुभएको छ ।
जलाद खोला वन क्षेत्रभित्र पर्ने भएकाले त्यहाँ कुनै पनि किसिमको उत्खनन गर्नुअघि वन नियमावलीअनुसार प्रारम्भिक वातावरणीय परीक्षण प्रतिवेदन अनिवार्य हुन्छ ।
सो प्रतिवेदनलाई प्रदेश सरकारअन्तर्गतको वन तथा वातावरण मन्त्रालयले स्वीकृति दिनुपर्ने व्यवस्था रहेको मुख्यमन्त्री सिंहले बताए । वन मन्त्रालयको स्वीकृति पश्चात मात्र सम्बन्धित जिल्लाको डिभिजन वन कार्यालयले सहमति जनाउँछ र त्यसपछि मात्र स्थानीय तहले ढुंगा, गिट्टी र बालुवा उत्खननको ठेक्का दिन पाउँछ,” उहाँले भन्नुभयो ।
तर, मिथिला नगरपालिकाले वातावरणीय अध्ययन प्रतिवेदन आफैंले स्वीकृत गरेको देखिएको छ, जुन वैधानिक प्रक्रिया विपरीत हो । यसरी स्वीकृति नदिइ खोलामा ठेक्का लगाएर उत्खनन कार्य अघि बढाएको पाइएपछि मुख्यमन्त्री सिंहले सम्बन्धित ठेकेदारलाई आवश्यक कागजातसहित प्रदेश सरकारअन्तर्गतको मुख्यमन्त्री तथा मन्त्रिपरिषद् कार्यालयमा उपस्थित हुन निर्देशन दिनुभएको छ ।
उहाँले अनुगमनको क्रममा अवैध उत्खननको विरुद्ध कडा कारबाही गरिने चेतावनी पनि दिनभयो । उहाँले भन्नुभयो, “सरकारले वातावरणीय संरक्षण तथा प्राकृतिक स्रोतहरूको दिगो व्यवस्थापनलाई प्राथमिकतामा राखेको छ । नियम विपरीत गतिविधि गर्ने जो–कोहीलाई कानूनी दायरामा ल्याइनेछ ।
