जनकपुर, ११ चैत । धनुषाका २५ वर्षीय शिवशंकर महतो हत्या प्रकरणमा प्रहरीले उनकै श्रीमती सिर्जनालाई पक्राउ गरेको छ ।
उनको श्रीमती सिर्जनालाई पक्राउ गरी अनुसन्धान अघि बढाइएको महोत्तरीका प्रहरी प्रवक्ता डीएसपी सन्तुलाल जयसवारले बताए ।
धनुषाको क्षीरेश्वरनाथ नगरपालिका–८, दिगम्बरपुरका शिवशंकरको विभत्स हत्या भएको अवस्था गत शुक्रबार महोत्तरीको गौशाला नगरपालिका–८, सागरनाथ वनमा फेला परेको थियो ।
शुक्रबार साँझ ५ः३० बजे फेला परेको शवको प्रकृति हेर्दा धारिलो हतियार प्रयोग गरी हत्या गरिएको प्रहरीले जनाएको थियो । शवलाई घिसारेर केही पर लैजान खोजिएको संकेत समेत देखिएको डीएसपी जयसवारले बताए ।
शवको सनाखतपछि शिवशंकरको हत्याको रहस्य खुलेको थियो । श्रीमती सिर्जना र १० महिनो छोरासँगै गत विहीबार दिउँसो ससुराली हिडेका थिए ।
उनको सुराली बर्दिबास नगरपालिका–५, पशुपतिनगर हो । शिवशंकरको भाइ राम महतोका अनुसार उनीहरू मोटरसाइकलमा महेन्द्रनगरसम्म पुगेका थिए ।
त्यसपछि सिर्जनाले माइतबाट दुई वटा मोटरसाइकल बोलाएकी थिइन् । एक मोटरसाइकलमा सिर्जना छोरासहित थिइन् भने अर्कोमा शिवशंकर सवार थिए ।
मोटरसाइकलमा लैजाने व्यक्तिको पहिचान भइसकेको प्रहरीले जनाएको छ । प्रहरीले हत्या कुनै व्यक्तिगत रिसइबी वा प्रेम सम्बन्धकै कारण भएको हुनसक्ने आशंकामा अनुसन्धान गरिरहेको छ । करिब डेढ महिना अघि मात्रै शिवशंकर मुम्बईबाट धनुषा फर्किएका थिए ।
