जनकपुर, ३ चैत । जनकपुरमा छुरा प्रहार गरी एक युवकको हत्या भएको छ ।
जनकपुर उपमहानगरपालिका २३ बिन्धिका पप्पु यादवका १८ वर्षीय छोरा आशु यादवको हत्या भएको छ । शनिबार साँझ ५ बजेतिर होली खेल्ने क्रममा विवाद हुँदा स्थानीय लक्षमण महतोका छोरा २१ वर्षीय धर्मेन्द्र महतोले आँशुमाथि छुरा प्रहार गरेका थिए र उनको हत्या आरोपमा एक युवकलाई प्रहरीले छुरासहित पक्राउ गरेको धनुषाका प्रहरी प्रवक्ता डिएसपी वरुणबहादुर सिंहले बताए ।
छाती,ढाड र पेटमा छुरा प्रहारबाट गम्भीर घाइते आशुको उपचारको क्रममा प्रादेशिक अस्पताल जनकपुरमा साँझ करिब ६ बजे मृत्यु भएको छ ।
छुरा प्रहार गर्ने लक्षमण महतोका छोरा २१ वर्षीय धर्मेन्द्र महतोलाई छुरासहित तत्कालै पक्राउ गरी अनुसन्धान गरिरहेको जिल्ला प्रहरी कार्यालय धनुषाले जनाएको छ ।
