जनकपुरधाम, २७ फागुन । मधेशको गृह सञ्चार तथा कानूनमन्त्री राजकुमार लेखीको सुरक्षामा खट्दै आएका प्रहरी सहायक निरीक्षक (असई) वीरेन्द्रकुमार यादवको मृत्यु भएको छ ।
असई यादवको विराटनगरस्थित नोबेल अस्पतालमा उपचारको क्रममा सोमबार मध्यराति मृत्यु भएको हो । यादबको दरबन्दी मधेश प्रदेश प्रहरी गण जनकपुरधाममा थियो ।
मधेश प्रदेश प्रहरी कार्यालयका प्रवक्ता वरिष्ठ प्रहरी उपरीक्षक शान्तिराज कोइरालाले अचानक बिरामी परेका असई यादवको उपचारको क्रममा विराटनगरमा मृत्यु भएको पुष्टि गरे । उनले भने, ‘२५ गते राति असई यादवको छाती र पेट दुखेपछि जनकपुरकै गोदावरी अस्पतालमा भर्ना गरायौं । हिजो विराटनगर लगिएको थियो ।
उपचारको क्रममा राति मृत्यु भएको छ । प्रहरी उपरीक्षक कोइरालाका अनुसार असई यादव सिरहा नगरपालिका– २५ सुखचैनाका स्थायी बासिन्दा थिए ।
