जनकपुरधाम, २६ फागुन । पर्साको वीरगञ्जस्थित जिल्ला प्रशासन कार्यालय (सीडीओ अफिस)मै एक मिटरब्याज पीडितले आत्मदाह गर्ने प्रयास गरेका छन् ।
बाराको पचरौता नगरपालिका ४ घर भई हाल वीरगञ्ज २४, रामगढवामा बस्दै आएका करिब ६० वर्षीय बृजकिशोर प्रसाद साहले प्रशासन कार्यालयमै आत्मदाहको प्रयास गरेका हुन् ।
न्याय नपाएको गुनासो गर्दै साहले विषादी सेवन गर्नुका साथै शरीरमा पेट्रोल छर्केर आत्मदाहको प्रयास गरे । शरिरमा आगो लगाउन खोज्दा देखेका सशस्त्र प्रहरीले रोकेका थिए ।
पर्साका प्रमुख जिल्ला अधिकारी गणेश अर्यालले साहलाई उद्धार गरी उपचारका लागि नारायणी अस्पताल लगिएको र उपचार भइरहेको जानकारी दिए । उनका अनुसार साहको अवस्था खतरामुक्त रहेको चिकित्सकले जनाएको छ । घटनास्थलमा पीडित साहले लेखेको पत्र भेटिएको छ ।
