जनकपुर, २२ फागुन । सबभन्दा लामो धार्मिक पदयात्रा मधेशको महाकुम्भ मानिने परिक्रमाको धार्मिक मेला आज महोत्तरीको कञ्चनवनमा होली खेलेका छन ।
बुधवार महोत्तरीकै ध्र्रुवकुण्ड विश्राम गरेको परिक्रमाको धार्मिक लस्कर आज दिउँसो कञ्चनवन पुगेर होली मनाएका छन । त्यसको लागि स्थानीय सरकारले भव्य होली कार्यक्रम आयोजन गरेको थियो ।
कञ्चनवन प्रवेश गर्ने परिक्रमा यात्रीलाई भंगहा नगरपालिकाले भव्य स्वागत गरेको नगरप्रमुख संजिव साहले बताए । स्वागतको लागि ठाउँठाउँमा प्रवेशद्वार, पण्डाल, आवासको व्यवस्था गरिएको छ ।
उनका अनुसार तीर्थालुको लागि पुवा, खीर, सर्वत, अबिर, फूलमालाको व्यवस्था छ भन होली मिलन समारोह र सांस्कृतिक कार्यक्रम गर्न मञ्च तयार गरिएको छ । 
रंग, अविर, फूलमालाले परिक्रमा यात्रीलाई भव्य स्वागत गर्ने तयारी गरेको नगरप्रमुख साहले बताए । कञ्चनवनमा त्रेतायुगमा भगवान राम र सीताले रंग अविर खोलेर होली मनाएको धार्मिक विश्वास छ ।
आजको दिन पनि यहाँ आउने श्रद्धालुहरुले एक–अर्कालाई रंग, अविर लगाएर होली खेल्ने गर्दछन् । कञ्चनवनमा श्रद्धालुले होली खेलेपछि मिथिलाञ्चलमा होली प्रारम्भ भएको मानिन्छ ।
