सिन्धुली, १९ फागुन । श्रीमतीको हत्या अभियोगमा एक व्यक्ति पक्राउ परेका छन् । सिन्धुलीको दुधौली नगरपालिका–९ की १७ वर्षीया अनिशा सदाको हत्या आरोपमा उनका श्रीमान् २२ वर्षीय दिनेश सदालाई प्रहरीले आज पक्राउ गरेको छ ।
जिल्ला प्रहरी कार्यालय सिन्धुलीका प्रहरी उपरीक्षक गोविन्दराज काफ्लेका अनुसार दिनेशले गएराति घरछेउको भान्सामा घाँटी थिचेर श्रीमती अनिशाको हत्या गरेका हुन् ।
घटनाबारे आज बिहान ७ बजे स्थानीयले प्रहरीलाई जानकारी गराएपछि प्रहरी चौकी दुधौली र इलाका प्रहरी कार्यालय डकाहाबाट घटनास्थलमा गएको संयुक्त टोलीले अभियुक्त दिनेशलाई घरबाटै पक्राउ गरेको हो । घटनाको प्रारम्भिक अनुसन्धानका क्रममा आपसी मनमुटावका कारण श्रीमतीको घाँटी थिचेर हत्या गरेको देखिएको र दिनेशले श्रीमतीको हत्या गरेको भनी स्विकारेको प्रहरी उपरीक्षक काफ्लेले जानकारी दिएका छन ।
दिनेशलाई इलाका प्रहरी कार्यालय डकाहाको नियन्त्रणमा राखेर अहिले अनुसन्धानको काम भइरहेको छ । करिब १० महिनाअघि दुधौली नगरपालिका–९ लालपुरकी अनिशासँग दिनेशले प्रेम विवाह गरेका थिए ।
