काठमाडौं, ६ पौस । पहिलोपटक सञ्चालित देशकै सबैभन्दा ठूलो क्रिकेट प्रतियोगिता नेपाल प्रिमियर लिग (एनपीएल) को फाइनल खेल हेर्न बिहानैदेखि काठमाडौँको कीर्तिपुरस्थित त्रिवि मैदानमा दर्शकको घुइँचो लागिरहेको छ ।
दिउँसो १२ बजेपछि हुने फाइनलमा सुदूरपश्चिम रोयल्स र जनकपुर बोल्ट्स भिड्दै छन् । फाइनलका लागि बिहीबार नै सबै टिकट बिक्री भइसकेका छन् ।
तर टिकट लिएका र नलिएका दुवै खाले दर्शक मैदान बाहिर छन् । दर्शक आफ्नो मनपर्ने टोलीलाई समर्थन गर्न आफ्नो टोलीको झण्डा÷ब्यानरसहित छन् ।
सुरक्षाका लागि खेल स्थलमा बिहानैदेखि सुरक्षाकर्मी खटिएका छन् । दर्शकको बाक्लो उपस्थितिका कारण त्रिवि मैदानबाहिर धुलाम्य भएको छ । 
यसअघिका खेलमा करिब १५ हजार दर्शक सहभागी भएका थिए ।
