जनकपुर, ४ मंसिर । मंगलवार वारा जिल्लास्थित महागढिमाई नगरपालिका क्षेत्रको गढिमाई मन्दिरमा मधेश प्रदेशका ऊर्जा, सिंचाई तथा खानेपानी मन्त्री शेष नारायण यादवले अनुगमन गर्नुभएको छ ।
यस क्रममा मन्त्री यादवले मन्दिर क्षेत्रको समग्र अवस्था मूल्याङ्कन गर्दै, यस क्षेत्रमा खानेपानीको आपूर्ति, टावर लाइटको स्थापन, शौचालय निर्माण र सरसफाईका कामहरू अविलम्ब सुरु गर्ने प्रतिवद्धता व्यक्त गरे ।
उक्त अनुगमनमा महागढिमाई नगरपालिका प्रमुख उपेन्द्र यादव, वारा खानेपानी डिभिजन कार्यालयका प्रमुख डि.ई. किशोरी यादव, स्थानीयवासी, स्थानीय नेता तथा कार्यकर्ताहरूको उपस्थिती रहेको थियो ।
मन्त्री यादवले तीव्र विकासका लागि समन्वय र कार्यसम्पादनमा थप सुधारका लागि सम्बद्ध निकायलाई निर्देशन दिनुभयो । साथै, मन्त्री यादवले गढिमाई मन्दिरको क्षेत्रलाई धार्मिक, सांस्कृतिक र पर्यटन दृष्टिकोणबाट समेत महत्वपूर्ण केन्द्र बनाउने लक्ष्य राख्दै सम्बद्ध योजनाहरूलाई शीघ्र अघि बढाउने वचन दिनुभयो ।
उहाँले स्थानीय निकाय र सरकारबीचको सहकार्यलाई अझ सशक्त बनाउने उद्देश्य पनि व्यक्त गर्नुभयो ।
यस अनुगमनको क्रममा स्थानीयवासीहरूले मन्दिर क्षेत्रका आवश्यक विकासका पहलहरूको स्वागत गरेका छन् र मन्त्रीको यस प्रतिवद्धता सफल हुनेमा विश्वास व्यक्त गरेका छन् ।
