जनकपुर, २६ असोज । आज विजयादशमी पर्व धूमधामका साथ मनाइँदै छ । यस अवसरमा मान्यजनबाट टीका र जमरा लगाइने परम्परा रहेको छ ।
नेपाल पञ्चाङ्ग निर्णायक विकास समितिले टीका लगाउने लागि ११ बजेर ३६ मिनेटको उत्तम साइत तय गरेको जनाएको छ । यस्तो अवस्थामा, ११ बजेर ३६ मिनेटभन्दा अगाडि वा पछाडि टीका लगाउनु उपयुक्त नहुने विश्वास छ ।
यसमा नेपाल पञ्चाङ्ग निर्णायक समितिका पूर्वअध्यक्ष प्रा.डा. रामचन्द्र गौतमले जानकारी गराउँदै भने, “टीका र जमरा देवीको प्रसाद हो, र यो जुन समयमा पनि लगाउन सकिन्छ।
” उनले थपे, “आज बिहान ८ बजेर ३३ मिनेटमा देवी विसर्जन गरेपछि जुनसुकै समयमा मान्यजनबाट टीका र जमरा लगाएर आशीर्वाद लिन सकिन्छ।” “यदि साइतमा मिल्छ भने ११ बजेर ३६ मिनेटमा टीका लगाउने, नत्र आफूलाई अनुकूल जुन बेला मिल्छ, त्यहीबेला लगाउने हो ” प्रा. डा. गौतमले भने ।
नेपाल पञ्चाङ्ग निर्णायक विकास समितिका अध्यक्ष प्राध्यापक श्रीकृष्ण अधिकारीले भने, “सामान्य व्यक्तिले जुनसुकै समयमा टीका लगाए पनि, राज्य संचालकले भने उत्तम साइतमै टीका लगाउनुपर्छ।
” उनले थपे, “राज्य संचालकले शुभ साइतमा टीका लगाउँदा प्रभु, मन्त्र र उत्साहशक्ति प्राप्त हुने शास्त्रीय मान्यता छ, त्यसैले साइत दिइएको हो ।
