मोरङ, २९ भादौं । पूर्वप्रधानमन्त्री तथा नेकपा (माओवादी केन्द्र) का अध्यक्ष पुष्पकमल दाहाल प्रचण्डले आफू सरकारमा रहँदा राज्यको नेतृत्वमा बस्नेहरूले गरेको भ्रष्टाचारविरूद्ध कदम चालेको दाबी गरेका छन् ।
मोरङको ग्रामथानस्थित नेताचोकमा आयोजित पार्टी प्रवेश तथा बृहत् जनसभामा कार्यक्रममा बोल्दै उनले आफ्नो नेतृत्वमा भएको सरकारले सुशासनको पक्षमा, भ्रष्टाचारको विरुद्ध, सामाजिक न्यायको क्षेत्रमा र आर्थिक समस्या समाधान गर्ने जमर्को गरेको बताएका छन् ।
यस्तै मुलुकमा आर्थिक क्रान्ति गर्न भारतमा १० हजार मेगावट बिजुली बेच्ने सहमति गरेको, पञ्चेश्वर परियोजना अगाडि बढाउन पहल गरेको, चीन भ्रमणको क्रममा बीआरआई परियोजना ल्याउने लगायतका सम्झौता गरेको उनले जानकारी गराए ।
नक्कली भुटानी शरणार्थी प्रकरणमा बेचन झा पक्राउ परेपछि सुशासनको सुई बालकोट र बूढानीलकण्ठतिर सोझिएपछि सरकार ढालिएको प्रचण्डले आरोप लगाए ।
तर, आफू सरकारबाट निस्कँदा पनि विजेताको भावमा जनतामा आएको बताउँदै सरकारमा रहनेहरूको भने डरले गएको सातो अझै नफर्किएको दाबी गरे ।
कार्यक्रममा विभिन्न पार्टी छाडेर नेपाली काङ्ग्रेसका नेता नमोनारायण चौधरीको नेतृत्वमा सर्वसाधारणहरु माओवादीमा प्रवेश गरेका छन् ।
