एजेन्सी । भारतीय राज्य मणिपुरमा पूर्वमुख्यमन्त्रीको घरमा आक्रमणको भोलिपल्ट शनिबार (सेप्टेम्बर ७) फेरि हिंसा भड्किएको छ ।
जिरिवाम जिल्लामा शनिवार बिहान भएका दुई छुट्टाछुट्टै गोलीकाण्डमा पाँच जनाको मृत्यु भएको भारतीय अनलाइन दैनिक भास्करमा उल्लेख गरेको छ ।
इम्फालमा रहेको मणिपुर राइफल्सको मुख्यालयमा भीडले आक्रमण गरेको छ । सुरक्षाकर्मीको जवाफी कारबाहीमा ५ जना घाइते भएका छन् । प्रहरीका अनुसार पहिलो घटना जिल्ला सदरमुकामबाट करिब सात किलोमिटर टाढा जिरिवाममा भएको छ ।
संदिग्ध पहाडी लडाकुहरूले घरमा घुसेर सुतिरहेका एक वृद्धलाई गोली हानेर हत्या गरेका छन् । कुलेन्द्र सिंह नामका व्यक्ति मारिएका हुन् ।
उनी घरमा एक्लै बस्थे । वृद्धको हत्यापछि जिरिवाममा कुकी र मैतेई समुदायबीच गोली हानाहान भएको थियो । जसमा ४ जनाको मृत्यु भएको छ ।
बिहानैदेखि उक्त क्षेत्रमा लगातार गोली चलेको खबर छ । मृत्यु हुनेको संख्या बढ्न सक्ने अनुमान गरिएको छ ।
