जनकपुर, ४ भदौ । कमला पुल बनाउन माग गर्दै मधेशका मुख्यमन्त्री कार्यालय अगाडि १० जना युवाहरूले आमरण अनशनमा बसेका छन ।
हुलाकी राजमार्गअन्तर्गत सिरहा र धनुषाको सीमा जोड्ने कमला नदीको पुल निर्माणको माग गर्दै पुल निर्माण संघर्ष समिति संयोजक इन्जिनियर प्रवीण यादवको नेतृत्वमा १० जना युवाहरूले दिउँसो १ बजेदेखि आमरण अनशन थालेका छन् ।
अनशन बस्नेमा संयोजक यादव बाहेक सदस्य भोगेन्द्र साह, सिरहा नगरपालिका ६ का वडाध्यक्ष इन्द्रजित यादव, वडा ४ का वडाध्यक्ष मोहम्मद समशाद आलम, सिरहाको औरही गाउँपालिका वडा४ का वडाध्यक्ष सुरेन्द्र कुमार यादव, औरही–३ वडा अध्यक्ष जिवछ यादव, सनातन हिन्दु परिषद नेपालका अध्यक्ष मनिष कुमार यादव, इन्जिनियर शैलेश यादव, सिरहा नगरपालिका वडा–८ का वडा सदस्य इन्जिनियर रुपेश यादव र इन्जिनियर शिवशंकर यादवलगायत छन् ।
उनीहरूले आफ्नै लगानीमा पुल निर्माण प्रक्रिया ७ दिन भित्र सुरु नभए आमरण अनशन बस्ने चेतावनी दिएका थिए ।
उक्त अल्टिमेटमभित्र मधेश सरकारले कुनै चासो नदेखाएको भन्दै बाध्य भएर आमरण अनशन बस्नु परेको संयोजक यादवले बताए । २०७८ असार १३ गते भित्र सक्ने गरी काम भइरहेको बेला पुल नै भासिएको थियो ।
