काठमाडौं, ३१ साउन । भक्तपुरको गट्ठाघरमा ट्राफिक प्रहरीले जाँचका लागि रोकिराखेको स्कुटरलाई ट्रकले ठक्कर दिँदा एक महिलाको ज्यान गएको छ ।
ना ६ ख २१७३ नम्बरको ट्रकले बा३९प ८९४४ नम्बरको स्कुटरलाई ठक्कर दिँदा स्कुटरमा सवार महिलाको घट्नास्थलमै मृत्यु भएको छ। घटनास्थलमा झोला र किताबकापी भेटिएका छन् ।
प्रत्यक्षदर्शीका अनुसार कौशलटारबाट गठ्ठाघरतर्फ गइरहेको ट्रकले ट्राफिक चेकिङमा रोकिराखेको स्कुटरलाई ठक्कर दिँदा स्कुटर चालक घट्नास्थलमै मृत्यु भएको हो ।
तीव्र गतिको ट्रकले करिब एक सय मिटर परसम्म स्कुटरलाई घिसारेको थियो । चालकको शरीर क्षतविक्षत भएको छ भने परिचय अझै नखुलेको प्रहरीले जनाएको छ । 
ट्राफिक प्रहरीका कारण महिलाले ज्यान गुमाएको भन्दै स्थानीयले ट्राफिकविरुद्ध नाराबाजी गर्दै प्रदर्शनसमेत गरेकका छन । आक्रोशित स्थानीयले ठक्कर दिने ट्रकमा आगो लगाउने प्रयास गर्नुका साथै केही सवारी साधनमा तोडफोड गरे ।
दुर्घटनापछि गठ्ठाघरको अवस्था दिनभरजसो तनावपूर्ण बने । स्थिति नियन्त्रणमा लिन सशस्त्र प्रहरी परिचालनसमेत गर्नुपरेको थियो ।
