कैलाली, २४ साउन । सामाजिक सञ्जाल म्यासेन्जरमा कुरा गरेर भेट्न जाँदा कैलालीमा एक किशोरीमाथि सामूहिक बलात्कार भएको खुलेको छ ।
गोदावरी नगरपालिका–३ की १७ वर्षीया किशोरीलाई साउन ९ गते मध्य रातिमा बलात्कार भएको छ । केही महिनादेखि एक व्यक्तिसँग उनको सामाजिक सञ्जालमार्फत चिनाजान भएको थियो ।
एक पटक पनि भेट नभएको व्यक्तिलाई भेट्न गएको र त्यही क्रममा उनलाई दुई जना किशोरले बलात्कार गरेको प्रहरीको प्रारम्भिक अनुसन्धानबाट खुलेको छ ।
९ साउनको राति किशोरीलाई घर बाहिर भेट्न बोलाएका थिए । उनलाई एक युवकले मोटरसाइकलमा राखेर राति साढे १ बजेको समयमा गोदावरीकै मालाखेती जङ्गलमा लगेर बलात्कार गरेको अनुसन्धानमा खटिएका एक प्रहरी अधिकारीले जनाएको छ ।
फेसबुकमा कुरा गर्ने युवकले बलात्कार गरेर त्यसपछि अर्का एक युवकले पनि ती किशोरीलाई बलात्कार गरेका थिए । अन्य केही युवा पनि नजिकै रहेका थिए ।
उनीहरुले सामूहिक बलात्कार गरेपछि राति करिब ३ बजे किशोरीलाई घरमा पुर्याएका थिए । ९ गतेको घटना भएपनि प्रहरीमा ११ गते उजुरी परेको थियो ।
अनुसन्धानका क्रममा प्रहरीले एक युवकलाई पक्राउ गरेको र अन्य एक जनाको खोजी गरिरहेको जनाएको छ ।
