काठमाडौँ, ९ असार । पूर्व भूमिसुधार राज्यमन्त्री रामचन्द्र रायको हत्या उनको सहयोगीले नै गरेको प्रहरीको अनुसन्धानबाट खुलेको छ ।
पूर्वराज्यमन्त्री राय सर्लाहीको चन्द्रपुर गाउँपालिका–१ रतनपुरस्थित आफ्नै घरमा साउन ७ मा मृत भेटिएका थिए । घरमा सहयोगीको रूपमा कार्यरत २१ वर्षीय राम उजेन रायले उनको हत्या गरेको अनुसन्धान गरिरहेका अधिकृतहरूले बताएका छन् ।
प्रहरीसँग आरोपीले हत्या गरेको स्वीकारेका छन् । पूर्वमन्त्रीले गाली गरेपछि आफुले आवेशमा आएर उनको हत्या गरेको बताएका छन । ‘पोलिग्राफ परीक्षण गर्दा उनले ढाँटेको देखिएको जिल्ला प्रहरी कार्यालय सर्लाहीका एक जना अधिकृत भनेका छन ।
रतनपुरमा राज्यमन्त्रीका ३ वटा घर छन् । तीमध्ये एउटा घरमा सहयोगी राम उजेन उनीसँगै बस्दै आएका थिए । घरको काम बिगारेको भन्दै गाली गरेपछि आवेशमा फर्सेले हिर्काएर हत्या गरेको अनुसन्धानबाट खुलेको छ ।
यसअघि राम उजेनले राति घरमा ३ जना मानिसहरू आएको र पूर्वराज्यमन्त्रीको आग्रह अनुसार आफूले ओछ्यान मिलाइदिएको बताएका थिए । पोलिग्राफ परीक्षण गर्दा उनले झुट बोलेको देखिएको छ ।
