काठमाडौं, २० असार । राष्ट्रिय स्वतन्त्र पार्टी (रास्वपा) ले निलम्बित महामन्त्री मुकुल ढकालको प्रतिवेदन सार्वजनिक गर्नेभएको छ ।
कार्यवाहक प्रवक्ता मनिष झाले प्रतिवेदन सार्वजनिक गर्न लागेको जानकारी दिनुभएको छ । झाले प्रतिवेदन रास्वापाको नभएर डा. मुकुल ढकालको भएको पनि दोहो¥याएका छन् ।
सञ्चारकर्मीहरूलाई सम्बोधन गर्दै उनले लेखेका छन्, ‘हिजो पार्टी कार्यालयमा पत्रकार भेटघाट दौरान तपाईँहरूलाई जानकारी गराए अनुसार र आज यो समूह बनाउँदै गर्दा भने झैं अब म डाक्टर मुकुल ढकाल ज्यू को समीक्षा यात्राको प्रतिवेदन यहाँ सार्वजनिक गर्दैछु ।
यो प्रतिवेदन रास्वपाको नभएर डा. मुकुल ढकालको हो । यसलाई सार्वजनिक गरेर न्याय गरियोस् भन्ने उनको अनुरोध अनुसार प्रतिवेदनको लिन्क पठाउने कार्यको सहजीकरण मात्र गरेको जानकारी गराउँदछु ।
सोही प्रतिवेदनको विषयले पार्टीमा विववाद बढ्दै जाँदा ढकाललाई रास्वपाले कारबाहीमा गरेको थियो । पार्टीको अनुशासन विपरित गतिविधि गरेको भन्दै ढकाललाई बुधबार बसेको रास्वपा केन्द्रीय समितिको बैठकले एक हप्ताका लागि महामन्त्री पदबाट निलम्बन गरेको हो ।
ढकालले एक महिने देश दौडाहापछि तयार पारेको प्रतिवेदन पार्टी सभापतिलाई बुझाएपछि विवाद सतहमा आएको थियो । उनले पार्टी यही ढंगबाट चले आगामी निर्वाचनमा राष्ट्रिय पार्टी नहुनेदेखि पार्टीमा एकलौटी ढंगले सभापति चलेकोसम्मका आरोप लगाएका छन् ।
यसबारे आफूले लेखेको प्रतिवेदन जस्ताको तस्तै सार्वजनिक हुनुपर्ने र केन्द्रीय कमिटी बैठक लाइभ गर्नुपर्ने उनको भनाइ थियो ।
