रौतहट, ३ चैत । रौतहटको भारतीय सिमानासँग जोडिएको दक्षिणी भेग परोहा नगरपालिकास्थित खाप चौकमा शिव मनी ट्रान्सफरका सञ्चालक नितेश साहमाथि भएको गोली प्रहार घटनामा पक्राउ परेका तीनजना भारतीय अपराधीलाई शनिबार प्रहरीले सार्वजनिक गरेको छ ।
घटनामा संलग्न तीन जना भारतीय अपराधीलाई स्थानीयको सहयोगमा शुक्रबार रौतहट प्रहरीले नियन्त्रणमा लिन सफल भएको थियो । जिल्ला प्रहरी कार्यालयका प्रवक्ता एवं डीएसपी एलिजा गिरीका अनुसार मनी ट्रान्सफरमा स्वचालित पेस्तोल र कटुवा बोकेर आएका तीन जना भारतीय अपराधीहरूले काउन्टरमा बसेका सञ्चालक २६ वर्षीय नितेश साहलाई गोली प्रहार गर्दै हतियारको बलमा रकम लुटेका थिए ।
लुटेको रकम लिएर निस्कने क्रममा नितेशले अवरोध गरेपछि आपराधिक समूहले गोली प्रहार गर्दा साहको कञ्चटमा लागेको थियो । घाइते नितेशलाई तत्कालै उपचारको लागि प्रादेशिक अस्पताल गौरमा सामान्य उपचारपछि थप उपचारको लागि एलएस न्यूरो परवानीपुरमा पठाइएको थियो ।
उनको सघन उपचार कक्ष (आईसीयू) मा उपचार गर्न पठाइएकोमा उनको आँखामा समस्या देखिएकोले तिलगंगा अस्पताल काठमाडौँ रेफर गरिएको छ ।
साहको अवस्था स्थिर रहेको प्रवक्ता डीएसपी गिरीले बताइन् । अपराधीहरू घटना लगतै सीमापारी भाग्ने आशङ्कामा तत्कालै सीमा क्षेत्रमा ठुलो सङ्ख्यामा नेपाल प्रहरी र सशस्त्र प्रहरी खटाइएकोमा स्थानीयहरूले लखेट्दै गरेको अवस्थामा दशगजा क्षेत्रबाट तिनै जना अपराधीलाई नियन्त्रणमा लिएको गिरीले बताइन् ।
भारत विहार राज्यको पूर्वी चम्पारण मोतिहारी जिल्लाको चिरैया थाना दिपही गाउँका १९ वर्षीय मुनिष भन्ने मुनिफकुमार यादव, सोही ठाउँ का १८ वर्षीय राधा भन्ने राजकुमार पासवान र २० वर्षीय चुनुकुमार सिंह भन्ने चन्द्रभान सिंहलाई पक्राउ गर्न सफल भएको प्रवक्ता गिरीले पत्रकार सम्मेलनमा जानकारी गराइन् ।
उनीहरूले प्रयोग गरेको भारतीय नम्बर बीआर ०६ सीएल ९७९६ अपाचे मोटरसाइकल, एक राउन्ड खोका, एक थान कटुवा पेस्तोल, कटुवा पेस्तोलमा प्रयोग हुने ८ एमएम कैलिवर भएको गोली थान १, ७.६२ एमएम को गोली अर्ध स्वचालित पेस्तोल थान एक र सोमा लाग्ने म्याग्जिन एक थान र सोको गोली ५ राउन्ड र फायर भएको गोली एक थान तथा लुटपाट गरिएको एक लाख २५ बरामद भएको बताइन् ।
पक्राउ परेका तीनैजना अपराधीलाई ज्यान मार्ने उद्योग, हातहतियार खरखजाना र चोरी तथा डाँका सम्बन्धी कसुर अन्तर्गत मुद्दा दर्ता गरेर अनुसन्धान भइरहेको जिल्ला प्रहरी प्रवक्ता डीएसपी गिरीले बताइन् ।
