बारा, १५ फागुन । बाराको निजगढमा शंकास्पद वस्तु विस्फोटमा ३ जनाको मृत्यु भएको घटना अनुसन्धानको लागि प्रहरीले दुई जनालाई पक्राउ गरेको छ ।
पक्राउ पर्नेमा एक नेपाली र एक भारतीय नागरिक रहेका जिल्ला प्रहरी कार्यालय बाराका प्रहरी उपरीक्षक (एसपी) सुरेश काफ्लेले जानकारी दिएका छन ।
‘पक्राउ पर्नेमा निजगढ नगरपालिका– ९ का २९ वर्षीय टीकाराम पाख्रिन र भारतको मोतिहारी घर भएका ४० वर्षीय रमेश जैसवाल छन्,’ एसपी काफ्लेले भने, ‘विस्फोटमा परेर अहिलेसम्म ३ जनाको मृत्यु भइसकेको छ । एक घाइतेको अवस्था गम्भीर छ ।
पक्राउ पर्ने पाख्रिन कबाडी सामान बेच्ने व्यक्ति हुन् । उनी निजगढ निवासी हुन् । जैसवाल कबाडी सामान किन्ने व्यवसायी भएका प्रहरीले जनाएको छ । जैसवालले निजगढमै कबाडी गोदाम सञ्चालन गर्दै आएका छन् ।
विस्फोटमा ठूलो मानवीय क्षति भएपछि जैसवाल कबाडी गोदामबाट एम्बुलेन्स चढेर भारतीर भाग्दै गरेको अवस्थामा पक्राउ परेका एसपी काफ्लेले बताए ।
‘विस्फोटपछि उनी पत्नी र छोराछोरीसहित एम्बुलेन्स चढेर भारततिर भाग्दै थिए,’ एसपी काफ्लेले भने, ‘हामीले अनुसन्धानको लागि उनलाई हिजै साँझ कलैयाबाट पक्राउ गरेर हिरासतमा राखेका छौँ । विस्फोट भएको वस्तु के हो अझै खुल्न बाँकी रहेको उनले बताए ।
विस्फोटमा परेर वर्कशप सञ्चालक निजगढकै ४५ वर्षीय रेशम मगर, भारतको गवाई घर भएका ३५ वर्षीय राकेश जैसवाल र वीरगञ्जका रितु रजतको मृत्यु भएको प्रहरीले जनाएको छ ।
मगरको सोमबार दिउँसो र जैसवालको गएराति र रजतको केहीबेर अघि मृत्यु भएको हो । विस्फोटमा परेर गम्भीर घाइते भएका उनीहरुलाई उपचारको लागि वीरगन्जस्थित बयोधा अस्पताल लगिएको थियो ।
निजगढ नगरपालिका– ७ मा रेशम मगरले सञ्चालन गर्दै आएको रोहित वर्कशप लेथमा सोमबार दिउँसो कबाडीबाट ल्याएको शंकास्पद बस्तु काट्ने क्रममा विस्फोट भएको थियो। विस्फोटमा गम्भीर घाइते भएका निजगढ ५ निवासी वर्कशप सञ्चालक मगरको त्यतिबेलै मृत्यु भएको थियो ।
विस्फोटमा परेर निजगढ नगरपालिका– ५ का ४५ वर्षीय सूर्यबहादुर थापा, पर्साको वीरगन्ज महानगरपालिका– ९ घर भएका ३४ वर्षीय फिरोज देवान र भारतको रामघडवा घर भएका २० वर्षीय अरविन साह घाइते भएका छन्।
त्यसमध्ये गम्भीर घाइते अरविनको बयोधाकै आईसीयूमा राखेर उपचार भइरहेको छ । बाँकी दुई घाइतेमध्ये देवानको बयोधामा र थापाको निजगढमै रअहेको सामुदायिक प्रसूतिगृह अस्पतालमा उपचार भइरहेको एसपी काफ्लेले बताए ।
