जनकपुरधाम, २४ माघ । लोकतान्त्रिक समाजवादी पार्टी (लोसपा)का मधेस प्रदेशसभा संसदीय दलका नेता अभिराम शर्माको सेवासुविधा रोक्का गरिएको छ ।
मधेश प्रदेशसभा सचिवालयले माघ महिनादेखि प्रदेश सांसद शर्माको सेवासुविधा रोक्का गरेको । गत मंसिर २८ गते महोत्तरी जिल्ला अदालतले असई थमन विक हत्या प्रकरणमा शर्मालाई जन्मकैदको फैसला सुनाको थियो ।
गत माघ १४ गते एक कापर थरका व्यक्तिले शर्माको अदालतको फैसलासहित उनको सेवासुविधा रोक्का तथा पद निलम्बन गर्न प्रदेशसभामा उजुरी दिएका छन् ।
गत पुस महिनासम्म शर्माले सेवासुविधा पाइसकेका छन् । माघ महिनादेखि शर्माको सेवासुविधा रोक्का गरिएको सभामुख रामचन्द्र मण्डलले बताए ।
०७२ भदौ २८ मा दोस्रो मधेस आन्दोलनका बेला सशस्त्र प्रहरीका असई थमन विकको हत्याको अभियोगमा महोत्तरी जिल्ला अदालतले शर्मासहित ७ जनालाई जन्मकैदको फैसला सुनाएको थियो ।
फैसलाकै बेलादेखि प्रदेश सांसद शर्मा फरार छन् । गत माघ ११ गते भएको राष्ट्रिय सभाको चुनावको मतदानमा समेत उनी अनुपस्थित थिए ।
