जनकपुरधाम, ७ माघ । मधेश प्रदेश सरकारका मुख्यमन्त्री सरोजकुमार यादवले जनमत पार्टीका मन्त्रीहरूलाई बर्खास्त गर्ने भएका छन् ।
सोमबार जनकपुरधाममा आयोजित अभिमुखिकरण कार्यक्रममा मुख्यमन्त्री यादवले सत्ता गठबन्धनले जनमत पार्टीलाई सरकारबाट बाहिरको बाटो देखाउने बताएका छन ।
यादबले भने, “गठबन्धनले भने आजै जनमतका मन्त्री निकाल्छु । नभए माघ ११ गतेपछि निकाल्छु । माघ ११ गते राष्ट्रियसभा निर्वाचन हुँदैछ ।
सो निर्वाचनमा केन्द्रीय सत्ता गठबन्धनका साझा उम्मेदवारविरूद्ध गठबन्धनका घटकसमेत रहेको जनमत पार्टीले उम्मेदवारी दिएको छ । गठबन्धनको निर्णय अस्वीकार गर्दै राष्ट्रियसभा निर्वाचनमा उम्मेदवारी दिएपछि असन्तुष्ट दलहरूले जनमत अध्यक्ष सिके राउतलाई गठबन्धन बैठकमा बोलाउन छाडेका छन् ।
मधेश सरकारमा जनमत पार्टीका शिक्षा तथा समाजकल्याण मन्त्री महेश प्रसाद यादव र श्रम तथा यातायात मन्त्री चन्दन सिँह रहेका छन ।
