जनकपुरधाम, २४ पुस । सिरहामा मिटरब्याज पीडितमाथि दुर्व्यवहारसँगै खुकरी प्रहारको प्रयास गरेको आरोपमा प्रहरीले एक जनालाई पक्राउ गरेको हो ।
कल्याणपुर नगरपालिका–८ अरङका मिटरब्याज पीडित सञ्जयकुमार कामतीमाथि दुर्व्यवहारसँगै खुकुरी प्रहारको प्रयास गरेको आरोपमा रामनारायण सिंहलाई प्रहरीले पक्राउ गरेको इलाका प्रहरी कार्यालय मिर्चैयाका डीएसपी जितेन्द्र वस्नेतले बताए ।
डीएसपी बस्नेतले भने भिडियोमा खुकुरी तेर्साएको पाइएपछि उनलाई आज घरबाटै पक्राउ गरेको छु । अहिलेसम्म पीडितले उजुरी दिएको छैन । अहिले नियन्त्रणमा राखेका छौं ।
पीडितले उजुरी दिएपछि कानुन कारबाही गर्छौ । कल्याणपुर नगरपालिका वडा नं. ८ मझौराका मिटरब्याजी सुरेश पञ्जियारले कब्जा गरी रामनारायण सिंहसँग बेचिसकेको घरमा सोमबार दिउँसो सञ्जय पस्न खोजेपछि उनीमाथि कुटपिटसँगै खुकुरी प्रहारको प्रयास भएको थियो ।
सिंहका छोरा शैलेन्द्र, भाइ नितेश सिंह समेत आफूमाथिको घटनामा संलग्न रहेको पीडित सञ्जयले बताए ।
उनले मिटरब्याजी सुरेश पञ्जियारका भाइ दिनेश र रामनारायणमाथि जिल्ला प्रशासन कार्यालयमा अनुचित लेनदेन सम्बन्धि उजुरी गत वैशाखमै दर्ता गराएका थिए ।
