केपि रिपोर्टर, निभा झा
जनकपुरधाम, १८ पुस । यो सातादेखि तराईका जिल्लाहरुमा सीतलहर चलिरहेको छ । शितलहरका कारण जनजिवन प्रभावित बनेको छ ।
धनुषामा शितलहर चलेका कारण बजारमा मानिसको चहल पहल घटेको छ जसका कारण व्यापार व्यवसायमा समेत प्रत्यक्ष असर परेको छ ।
शितलहरका कारण किसानले खेतका लगाएको आलु र तोरी बालीमा समेत असर परेको छ । तराईका जिल्लाहरु विगत केहि दिनदेखि दिनभर चिसो हावा चल्नुका साथै घाम नलाग्दा हुस्सुले ढाकेको छ ।
स्थानिय निकायले शीतलहरबाट वच्नको लागी कुनै ठोस योजना बनाएको देखिदैन, विशेष गरी ग्रामिन भेगका मानिसहरु चिसोका कारण वढि प्रभावित भएका छन । वालवालिका जेष्ठ नागरिक अझ वढि प्रभावित बनेका छन ।
नगरपालिकाले कुनै ठोस योजना बनाउन नसकिरहेको अवस्थामा स्थानियवासीले बाटो हिडने बटुवा र आफुलाई समेत हुने गरी दाउरा किनेर बालिरहेका छन ।
तराई भु भागमा जाडोको अत्याधिक नकारात्मक असर पर्ने गर्दछ । जाडो तथा शितलहरले प्रत्येक वर्ष हजारौ मानिसलाई प्रभावित गर्दछ । धुलोको कणहरु सहित जाडोको तरगंले हावालाई चिसो पर्दछ ।
पुष महिनादेखि मध्य माघसम्म सबैभन्दा बढी जाडो हुनेगरेको छ । जमिनको सतहबाट २ सयदेखि ४ सय मिटरसम्म ढुसी तथा तुवालोले ढाक्दछ । यसकारण, विहानमा त भिजिविलिटी पनि निकै कम हुन्छ ।
तापक्रम १० देखि १५ डिग्री सेल्सियससम्म कम हुंदा कतिपय मानिसको हाइपोथर्मियाका कारण मृत्यु समेत हुन्छ । चिसो तथा शितलहरका कारण स्वासप्रस्वास, रुघाखोकि, निमोनिया जस्ता स्वास्थ सम्वन्धि समस्याबाट धेरै मानिसहरु विरामी पर्ने र केहि व्यक्तिको मृत्यु समेत हुने गरेको छ ।
यसबाट विशेष गरी बाल बालिका जेष्ठ नागरिक, सुत्केरी, गर्भवति शितलहरबाट सबैभन्दा बढी प्रभावित हुन्छन् ।
