जनकपुरधाम, १७ पुस । नेपालको प्रजातान्त्रिक आन्दोलनका योद्धा महोत्तरीका त्रिपुरारी मिश्रको ५४ वर्षको उमेरमा निधन भएको छ ।
महोत्तरीको पिपरा गाउँपालिका–३ का बासिन्दा मिश्रको सोमबार राति निधन भएको छ । मिश्र लामो समयदेखि उच्च रक्तचाप र मधुमेहबाट पीडित थिए ।
पञ्चायतकालमा किशोरवयमै नेपाल विद्यार्थी सङ्घमा आबद्ध भएर नेता मिश्रले प्रजातान्त्रिक आन्दोलनमा योगदान गर्नुभएको नेपाली कांग्रेस महोत्तरीका नेता बजरङ्ग नेपाली बताए ।
वि.सं २०४६ को जनआन्दोलनले प्रजातन्त्र पुनःस्थापना गरेपछि नेपाली कांग्रेसमा क्रियाशील भएका मिश्रको योगदान अनुकरणीय रहेको नेपाली कांग्रेस महोत्तरीका सभापति नागेश्वर यादव जनाएका छन् ।
स्वर्गीय मिश्रका पत्नी, एक छोरा र एक छोरी छन् ।
