काठमाडौँ, १२ पुस । धरान उपमहानगरका प्रमुख हर्क साम्पाङले आफ्नो कार्यकक्षमा रहेको राष्ट्रपति र प्रधानमन्त्रीको फोटो हटाएर प्रथम किराती राजा यलम्बरको तस्वीर राखेका छन् ।
उपमहानगरका उपप्रमुख अइन्द्र विक्रम बेघाले तस्वीर हटाएर यलम्बरको तस्वीर राखेको जानकारी पाएको बताए ।
उनै हर्क साम्पाङले बुधवार ‘भोलि म राष्ट्रपति र प्रधानमन्त्रीको फोटो हटाएर यलम्बरको फोटो राख्दै छु, जुन दिन केन्द्रले धरानलाई महत्त्व दिन्छ‚ त्यो दिन पुनः उनीहरूको फोटो टाँस्नेछु, जय देश’ भन्दै फेसबुकमा स्ट्याटस लेखेर हालेका थिए ।
यसको चर्काे विरोध भइरहेको छ । आधिकारिक जानकारी भने अझै नभएको उपमहानगरका उपप्रमुख बेघाले जानकारी दिए । उनका अनुसार उनको कार्यकक्षमा पत्रकारलगायत अन्यलाई छिर्न निषेध गरिएको छ ।
