काठमाडौं, १८ कातिक । भूकम्पप्रभावितको उद्धार र राहतका काम एकद्वार प्रणालीबाट लागू गर्ने निर्णय गरेको उपप्रधान तथा गृहमन्त्री नारायणकाजी श्रेष्ठले बताएका छन् ।
गृह मन्त्रालयको आकस्मिक बैठकपछि उनले उद्धारका लागि नेपाली सेना, नेपाल प्रहरी, सशस्त्र प्रहरी बल नेपाललाई परिचालित गरेको भन्दै आवश्यक परेको अवस्थामा अझ जनशक्ति पठाउने निर्णय गरेको बताए । श्रेष्ठले भने, ‘रेस्क्यूको लागि आवश्यकताअनुसार दक्ष जनशक्ति पठाउनेछौँ ।
बिहानदेखि नै नेपाली सेना, नेपाल प्रहरी, सशस्त्र प्रहरी बल परिचालन भएका छन् । उद्धार र राहतका काम एकद्वार प्रणालीबाट लागू गर्ने निर्णय पनि गरिसकेका छौँ ।’
उनले आवश्यकताअनुसार कम्बल, पाल, खानेकुराको व्यवस्था गर्नुको साथै भूकम्पको कारणले अवरुद्ध भएका सडकलाई चाँडै खुलाउनका लागि पनि प्रयास भइरहेको बताए । उनले भने, ‘आजको आवश्यकता हेरेर हामीले कम्बल, पाल, खानेकुराका लागि जे जे आवश्यक हुन्छ त्यसको व्यवस्था भइसकेको छ, पुगेन भने तुरुन्तै खबर गर्न प्रादेशिक सरकार र जिल्ला व्यवस्थापन समितिहरुलाई निर्देशन दिएका छाँ ।
त्यसको तत्काल व्यवस्था गर्छौं । भूकम्पको अवरुद्ध भएका सडकलाई केही घण्टाभित्रै खुलाउनका लागि आवश्यक सामग्री पुगिसकेको छ । सडक विभागलाई त्यसको जिम्मेवारी दिएका छौँ ।’
उनले भने, ‘प्रधानमन्त्रीको निर्देशनमा घाइतेको सम्बन्धित स्थानमा उपचारको व्यवस्थालाई पहिलो प्राथमिकतामा राखेर त्यो काम भइरहेको छ । अहिले हाम्रो प्रमुख नीति सर्च, रेस्क्यू र रिलिफलाई बनाएका छौँ ।
त्यसअन्तर्गत हामीले मूल बसश सुर्खेतलाई बनाउने र सहायक बेस नेपालगञ्जलाई बनाएर आवश्यक जनशक्ति, सामग्री र व्यवस्थापन त्यहाँबाट हुनेगरी व्यवस्था गरेका छौँ ।’
