काठमाडौं, ११ असोज । सीके राउत नेतृत्वको जनमत पार्टीले कुनै पनि दलसँग एकता र गठबन्धन नगर्ने जनाएका छन ।
बिहीबार पत्रकारहरुसँगको छलफलमा बोल्दै जनमत पार्टीका नवनियुक्त प्रवक्ता डा. शरदसिंह यादवले अन्य दलसँग राजनीतिक सम्बन्ध राख्ने र सहकार्य गर्ने, तर पार्टी एकता र गठबन्धन नगर्ने बताएका छन ।
नागरिक उन्मुक्ति पार्टीसँग कार्यगत एकता गरिसकेको जनमत पार्टीले त्यसलाई एकता वा गठबन्धनका रूपमा बुझ्न नहुने यादवले बताएका छन ।
यस्तै राष्ट्रिय स्वतन्त्र पार्टी (रास्वपा) सँग पनि औपचारिक सम्बन्ध मात्रै रहेको प्रवक्ता यादवले बताए । राष्ट्रिय स्वतन्त्र पार्टी होस् चाहे नागरिक उन्मुक्ति पार्टीसँग हाम्रो सम्बन्ध छ र विभिन्न मुद्दामा सहकार्य हुनसक्छ’, प्रवक्ता यादवले भने, ‘तर कुनै पनि दलसँग एकता र गठबन्धन नगर्ने भन्ने जनमतको स्पष्ट लाइन छ ।
प्रवक्ता यादवले नागरिक उन्मुक्ति र लोसपासँग उपराष्ट्रपतिका लागि मोर्चाबन्दी भएको तर उनीहरुले धोका दिएपछि मोर्चा अगाडि नबढेको बताए ।
उनले जनमत पार्टी ‘मिसन २०८४’ मा लागेको भन्दै आगामी निर्वाचनमा कम्तीमा दुई वटा प्रदेशमा बहुमत ल्याउने र सरकार पनि बनाउने बताए । साथै, संघमा पनि बलियो उपस्थिति हुने गरी तयारी भइरहेको उनको भनाइ छ ।
