काठमाडौं, २७ भदौ । मधेश प्रदेश पर्साको वीरगञ्जस्थित बाल सुधार गृह रातभर तनावग्रस्त भएको छ ।
आज बिहान स्थिति सामान्य भए पनि प्रहरीहरुको सुरक्षा सतर्कता कायम राखिएको छ । गएराति बाल सुधार गृहमा रहेकाहरुबीच एक आपसमा विवादका कारण तनाव भएको थियो ।
दुई समूहबीचको विवादले झडपको रुप लिँदा केही कैदीबन्दीहरु घाइते पनि भएका छन् । उनीहरुको नारायणी अस्पतालमा उपचार भइरहेको छ ।
बाल सुधार गृहमा तनाव बढेको थाहा पाएपछि प्रहरी परिचालन गरिएको थियो । त्यसपछि झन् आक्रोशमा आएकाहरुले बाल सुधार गृहमा तोडफोड गर्नुका साथै प्रहरीमाथि पनि ढुंगामुढा प्रहार गरेका थिए ।
आज बिहानको अवस्था सामान्य रहेको जिल्ला प्रहरी कार्यालय पर्साका प्रवक्ता एवम् डिएसपी कुमार विक्रम थापाले बताए ।
अहिले पनि बाल सुधार गृह बाहिर प्रहरी खटाइएको थापाले जानकारी दिए ।
