जनकपुरधाम,१६ भदौं । एमालेनिकट राष्ट्रिय युवा संघ नेपालले महँगीविरुद्ध जनकपुरधाममा मसाल जुलुस निकालेको छ ।
जनकपुरधामको जनकचौकमा युवासंघका कार्यकर्ताले एलपी ग्यास, पेट्रोलियम पदार्थ, खाद्यान्नलगायत उपभोग्य वस्तुमा भएको मूल्यवृद्धिविरुद्ध विरोध प्रदर्शन गरेको छ ।
प्रदर्शनमा सहभागी, महँगी नियन्त्रण, हाम्रो आन्दोलन जारी छ, प्रहरी दमन मुर्दावाद, मूल्य वृद्धि फिर्ता गर लगायता नाराका साथै प्रधानमन्त्रीको प्रचण्डको पुतला दहन गरेका थिए ।
मसाल जुलुसपछि आयोजित कोणसभालाई सम्बोधन गर्दै धनुषा जिल्ला अध्यक्ष रोशन कुमार यादबले सरकारले महँगी नियन्त्रणमा कुनै चासो नदिएको आरोप लगाए ।
‘आज हाम्रो देशले चरम मूल्य वृद्धि खेपिरहेको छ । हामीले बारम्बार सरकारलाई मूल्य वृद्धिबारे ध्यानाकर्षण गराउँदै गर्दा हाम्रो आवाजलाई सुनुवाइ गरेन,’ यादबले भने, ‘यदि सरकारले हाम्रो कुरा सुनेन भने ७७ जिल्लामा आगो बल्नेछ ।
सरकारलाई घुँडा टेकाउने छौँ भनेका थियौँ । त्यसै क्रममा आज देशैभरि मसाल जुलुस निकालिएको छ ।’ नीतिगत रुपमा सेटिङमा मूल्य वृद्धि भएको आरोप लगाउँदै उनले नीतिगत भ्रष्टाचारमा उद्योग मन्त्रालय र गृह मन्त्रालयको समेत मिलेमतो रहेको आरोप लगाए ।
