जनकपुरधाम, २८ साउन । आज प्रधानमन्त्री पुष्पकमल दहाल प्रचण्डले मन्त्रिपरिषद् हेरफेर गरेर जनमत पार्टीलाई सरकारमा ल्याउने तयारी गरेका छन् ।
प्रचण्डले जनमतबाट सांसद अनिता देवी साहलाई मन्त्रीमा नियुक्त गर्ने तयारी गरेका छन् । जनमतले पार्टीबाट सांसद अनिता देवी साहलाई मन्त्रीका लागि यसअघि नै सिफारिस गरिसकेको छ ।
प्रधानमन्त्री प्रचण्डले अनितालाई आज मन्त्री नियुक्त गर्ने तयारी गरेको प्रधानमन्त्रीको सचिवालयले जनाएको छ । प्रचण्डको मन्त्रिपरिषद् अहिले नै २५ सदस्यीय छ ।
जनमतलाई सरकारमा सहभागी बनाउन वर्तमान मन्त्रिपरिषद्का सदस्यलाई हटाउनु पर्नेछ । माओवादी केन्द्रबाट मन्त्री भएकामध्ये एकलाई हटाएर जनमतकी अनिता देवीलाई मन्त्री नियुक्त गर्ने तयारी प्रचण्डको रहेको छ ।
